恭喜你搵到新工，準備第一日返工，係咪好緊張呢？第一日帶比其他同事一個好印象係好重要，會影響你日後同同事之間既相處，以下貼士都係幫助你第一日返工既準備。
前一兩日要諗定著咩衫
衣著係第一個帶比人既印象，所謂「人靠衣裝，佛靠金裝」，係你開口同其人講野之前，你既外表印象已經植入佢地既腦入面，佢地會係腦到估計你係一個點樣既人，如果公司係可以著「Smart Casual」，咁你千祈唔好著晒成套西裝去返工，最多最多著件恤衫加西褲好啦，領呔都唔好打，你著錯衫，第一日返工同事可能都唔敢邀請你一齊食飯，切記切記，第一日返工既衣著係好重要，要配合返公司既政策去選擇你既衣著。
前一日就好放定返工要著既衫，唔好朝早臨急臨忙先去搵，發現有問題個陣，都起碼仲有足夠時間去補救。
另外帶定一件外套亦都無壞，如果公司冷氣太凍個陣可以著。
準備所有文件
第一日返工好可能要填表格或者交文件，記得帶齊身分證、銀行戶口、地址證明、相片、舊公司工作證明等等常用文件，唔記得帶文件係大忌，比人一個你係面試時無留心既印象，所以前一日要檢查自己係咪已經準備好晒所有必備文件，帶比人一個好印象啦！
準備所有工作用品或文具
自己準備可能要用到既工作用品或文具，例如記事本、筆、塗改液等等常用文具，因為可能公司無提供文具用品比你，唔好到時搞到要周圍問人借，會比人一個你無準備好返工既印象。
計劃好交通路線
要盡早選定一個認為最舒適快捷既交通路線，如果係選擇巴士或小巴既路面交通路線，要預計一下可能會塞車既時間，如果係選擇港鐵既交通路線，都要預計一下繁忙既轉車站會唔會因為太多人，而要多等幾架列車先上到。如果可以的話，計劃一條備用交通路線，萬一有起事上黎都唔駃慢慢企係度諗點返公司好。
前一晚要早睡為了早起
返新工既前一晚就唔好去玩啦，千祈唔好因為要慶祝而開一個通宵派對，較定鬧鍾，最少早半個鐘起身，第一日返工就遲到係大忌，而因為你未熟悉交通情況，有可能會比你預計既交通時間更長，為左唔好遲到，預計自己要提前半個鐘返到公司就最好。早睡亦都係為左養足精神，你都唔想第一日就係咁係辦公室打喊露，比人一個唔好既印象。
唔好比較新舊公司
唔好係新公司講返舊公司既規矩同做野方式，例如︰「我係舊公司都係咁做既」、「我以前係舊公司係可以點點點…」，第一日就係新公司講返舊公司既事係大忌，上司或老闆聽到隨時叫你即刻返舊公司做，新公司有新公司既做法同規矩，既然已經加入左新公司，就唔好再同舊公司比較啦！
唔好帶飯
第一日返工，同事們大多數都會邀請你一齊去食飯，一齊食飯係同同事更加熟絡既好方法，如果同事無主動邀請你，你都可以主動問一下可唔可以一齊食飯，等大家熟悉之後，做野會更加順暢，所以第一日就唔好帶飯咁傻啦！
唔好抱怨
唔好第一日就係公司抱怨，例如「公司離巴士站咁遠」、「要行一大段斜路先返到公司」，第一日就盡量忍住，唔好講抱怨既說話。
唔好太多口
你係未熟悉其他同事之前，就唔好太多口講你自己既事或你對其他同事既感覺，小心你既說話會傳到成間公司都係。
結語
第一日返工真係好重要，最重要係準備同預計好所有可能會發生既事，不過有上面既貼士幫你，你一定可以完美咁完成第一日返工既工作！
延伸閱讀︰
80 後一名，有 2 次 Working Holiday 經驗。