如何面對公司既黑面神

如何面對公司既黑面神

相信每個人都曾經遇過一種麻煩衰格既同事,我簡稱做黑面神,因為通常佢地對住自己都冇咩笑容。根據非正式統計,佢地多數係上左年紀又嫁唔岀既女上司或資深同事為多。我係眾多職場上,很不幸地,每次係新既工作環境總會遇到一個黑面神。我將佢地幾類有趣既特點歸類為以下幾項︰

 

一 熱愛加班

佢地經常黑面同心情差,有時會關乎佢地自己既私生活令到自己長期情緒不愉快,所以有翻咁上下資歷之後,就會當公司係自己屋企,同事係佢屋企人咁,將最真實殘暴既一面公諸於世。而當同事會忍讓既同時,佢會認為留係公司既存在感重高過係岀面,加上唔想放工面對自己唔愉快既生活,就會經常選擇慢慢做野慢慢收工,ot當食生菜。職位高既更加會強迫細既同事ot。

 

二 情緒管理差

佢地既情緒起伏通常非常大。黑面絕對係選擇性,尤其呢上年紀既女上司,我親眼見過唔少係:對男同事或上司唔單止笑容可掬,有時重會chok下把聲撒下嬌等人覺得佢係好人。而女同事呢,一開始扮好人,話呢度好free大家好似一家人咁,有時重會聊下你傾下自己野。到一段日子,你一有錯或者做得唔夠好就鬧到你拆天,但到放工又即刻變樣,比堆野你做再叫你比心機ot。唔講真係以為佢人格分裂。

 

三 放假都要問你翻工既野

奪命追魂call絕對唔係女朋友先會打,上司都絕對會打比你,係你放工或者放假既時間,不停追問翻你琴日或者前幾日翻工既小事。我之所以話係小事,係因為就算唔打比我都可以解決到。但佢地偏偏鍾意揾邊個做錯,再批鬥下咁。解決問題反而變左次要。

 

而呢種人之所以會岀現及變本加厲,首先要有一班壯佢膽既同事。例如間公司既流失率高令佢上位,新同事多過舊同事,都會形成呢種人存在。面對呢一種恐怖分子,我得岀以下三個結論︰

 

一 大魚食細魚

有冇玩過鬥獸棋呢?無論公司定社會,一個人永遠唔會大哂,一個治到佢既人就係你既希望。佢可以係更大職位既上司,又或者對黑面神有影響力既人。只要你揾到呢個人,就可以盡力同佢成為朋友或者熟既人,到時就可以齊齊度橋點樣避免比黑面神滋擾。多左個人望住佢唔敢令佢發圍既話,佢既行為就唔敢再咁明目張膽同過分。

 

二 與同事合作

所謂三個臭皮匠勝過諸葛亮,團結永遠就是力量。點解一個人可以成功係團體中做最惡最難頂果個而又可以繼續生存落去?其實每一個袖手旁觀既人都有份造成今日既局面。越係冇人去制止佢,越多人忍佢,就只會令佢覺得自己咁係冇問題。所以,如果太過分既話,應該一齊合力告投名狀,將佢既惡行向上司反映。我曾經遇過一個同事,就係一直忍呢種人忍到有抑鬱症,實在不值。

 

三 態度堅定而強硬

人善被人欺,確實係簡單一個道理。通常最善良又温文既人,就係呢種人既目標。佢地會利用你既怕事,去迫你做一啲唔公平或唔合理既事。例如不停增加你既工作量,迫你晚晚陪佢 ot,甚至有咩瑣事都會叫你做,十足十阿四咁。而且佢唔會一味勞役你,放工後可能會同你打翻關係,撩下你傾計,令你又再次相信佢只係因為工作認真先對你咁。No, it’s totally a bullshit. 呢種只係佢地係度既生存手段,所以佢地專會揾新同事或者弱勢既人入手。唔想成為佢地目標,必須要態度堅定,做人做事強硬啲,遇到太過分既要求要學會 say no。

 

最後,我最唔建議既方法,就係因為呢種人而選擇離開公司。因為我曾經就係呢種忍唔到而離開既人。但後來發現,根本全世界都充滿住呢一類人,每一個團體,每一個地方都有,甚至多於一個。逃避永遠唔會係解決方案既最好決定。遇到呢種人,點樣堅定自己既情緒唔受佢地影響係非常重要,同時係一門好高深既學問。如果意志唔夠堅定,好容易比佢地令到自己工作情緒越黎越差,甚至討厭翻工,討厭自己。所以一定要堅定自己心智,相信自己能力,必要時要揾人幫手,唔好一味死忍。只有真真正正咁面對到佢,先可以長久咁係職場生存。

 

延伸閱讀︰

發佈留言

發佈留言必須填寫的電子郵件地址不會公開。 必填欄位標示為 *