10 種令人噴血的職場「老屎忽」總有一個在身邊

令人噴血的職場「老屎忽」總有一個在身邊

相信各位返緊工既讀者對於「老屎忽」 – Old Seafood 都有一定既認識,因為基本上每一間公司都會有「老屎忽」存在,當中最令人噴血既竟然係「老屎忽」唔會有自覺自己係「老屎忽」呢個事實。

「老屎忽」唔分任何性別或年齡,唔一定是年紀比較大就係「老屎忽」,但佢地都有一個共通點 —— 已經同上司打好晒關係,仲完全摸清晒公司既規矩同底線。所以佢地可以肆無忌憚咁欺壓其他員工,令自己的工作量大幅減少,只做最少量既工作而唔會受到上司既問責。

工作量多都算!最令人憤怒既係所有功勞都屬於「老屎忽」!原因係︰因為有佢耐心教導同指導,所以先可以做好件事情,所有工作都係為左可以令你學習同成長。你話咁既「好」同事係咪會令人瘋狂?

以下 10 點都係「老屎忽」的特徵︰

 

1. 塞錢入你袋

「老屎忽」成日覺得佢既經驗同每一句說話都係好寶貴,每一次同佢講野佢都覺得係「塞錢入你袋」,無論講咩都好,佢都覺得自己係更加優越,其他人就係廢,完全唔會有虛心學習既態度。

 

2. 永遠唔會學新事物

「老屎忽」好鍾意係個 Comfort Zone – 舒適圈入面,叫佢學新野佢會搵一大堆籍口講根本無必要學新野,例如︰「舊個套都夠晒用」、「新個套有好多缺點」、「新個套一定唔 Work」。叫佢學新野真係仲慘過叫佢去死。

 

3. 千錯萬錯都唔會係佢錯

工作上大大小小既錯都唔會係佢錯,就算搵到証據証明真係佢出錯,「老屎忽」依然可以搵到一大堆籍口推比其他人,例如︰「係 A 搜集返黎既資料出錯,先令到結果出錯」、「係 B 同我講咁做先做到」。

 

4. 見高拜,見低踩

「老屎忽」其中一個重要任務就係要同職位比佢高既人打好關係,所以會不斷奉承上司,而對於職位比佢低既人?只不過係佢既工具,對待工具何必上心。

 

5. 比機會你學野

「老屎忽」好鍾意將工作包裝成學習機會,所有分派比你既工作都係為左比你學野、成長,絕對唔係為左令佢係返工時,有更多時間去做非公司既野。

 

6. 派假希望狗糧

「老屎忽」好識玩手段,知道長期高壓咁對待其他人係唔會維持到長久關係,佢會係適當時候派一下「假希望狗糧」,例如︰「只要做多 2 年就可以升職,加油!」、「做好今次工作,我會寫靚今年個 appraisal (工作評估報告) 」。最後會點?當然不了了知。

 

7. 只有佢既方法先係正確

工作方式有好多種,唔係得一種方法先可以達成目的,但「老屎忽」就係會睇唔慣其他人用既方法,會不斷咁要求你去跟佢個套去做,就算你既方法效率比佢個套高又準確過佢,佢依然會話你個套方法係錯、係唔正宗。

 

8. 掌握公司大小情報

「老屎忽」會要求你將公司入面大大小小既事都要向佢匯報,就算唔關公司事既是非佢都會好積極想知道,當佢掌握愈多情報就愈多機會捉到其他人痛腳,當佢有需要時就會拎返出黎講。

 

9. 擺高姿態

「老屎忽」成日講就講幫你,實際就踩你,例如︰「呢樣野唔係咁做,下次你做之前可以問左我先,如果唔係又要我執手尾就唔好啦!」

 

10. 永遠收埋最核心既事

「老屎忽」好驚有人取代到佢,所以佢永遠唔會主動教人最核心既事係點做,最好全公司都冇人識,得佢一個識咪顯得佢極為重要!

 

結語

「老屎忽」雖然無處不在,但要同佢鬥都鬥唔到,一來佢已經係公司好長時間,二來佢坐得係呢個位咁耐,真係有返咁上下既手段,所以唔好再同佢硬碰硬,做得唔開心直接辭職好過。另外亦提提大家,係上左位之後都要小心,唔好變左人地眼中既「老屎忽」。

 

延伸閱讀︰

想搵好工?入黎睇下啦!

發佈留言

發佈留言必須填寫的電子郵件地址不會公開。 必填欄位標示為 *