職場新人︰如何應答空白期

職場新人︰如何應答空白期

而家搵工真係困難重重,打工仔簡直要過五關斬六將,先勉強得到一個工作機會。而面對 HR 大關,好多人都好驚比人問到一樣野: 空白期。點解你有幾個月無做野咖?點解唔拎多啲工作經驗呀?點咩解姐?呢個世界好多野都無得解㗎!當然,雖然你好想將心果句講出黎,但最後都忍住左。面對 HR 既疲勞轟炸,千其唔好誠實回答!因為空白期都一樣有 Model answer!

 

最佳既回答:

 

1. 屋企有事

通常拎家事黎做擋箭牌,十之有九都唔敢再詳細咁追問落去。例如你可以話果排屋企人身體有事,而家已經搵到人照顧佢,又或者病情已經逐漸好轉,所以可以安心出翻黎做野。咁樣講既可以順理成章解釋空白期,同時亦都無咩值得比人質疑既位。因為通常聽到人地屋企有事,都唔會再咁無禮貌咁追問落去,至多只會叫你大概咁描述下當時既狀況。如果呢個時候 HR 重追根究底,甚至要你提供相關証明文件既話,得罪講句,咁無同情心既公司你都可以唔洗考慮啦。但係記得,最好唔好講係長期性病患或者講呢太誇張失實既家事,我相信 HR 好容易會淘汰經常比家事影響工作既人。所以記得話自己已經處理好家事,隨時準備好工作。

 

2. 裝備自己

唔想詛咒自己屋企人既話,你都可以從你自身入手。HR 最擔心同想了解既,並唔係你個空白期幾長,而係你係呢個空白期做過呢咩黎。如果你話自己空白期一直搵下工,休息下咁,咁就真係花式自殺啦。一個人有幾多實力,可以從佢既生活日常睇得出。如果日日遊手好閑咁過,你係 HR 都會感覺佢份人又懶又唔上進啦,仲搵鬼請咩。反之,如果你好好利用左呢個空白期去裝備自己,學習額外知識去提升自己既能力,對 HR 黎講絕對係非常加分既行為,因為佢請既呢個人無時無刻都進步緊。

另外,你亦都可以話自己趁住呢段時間試過創業,又或者一直做緊 Freelance 幫手,或兼職都好,比人感覺你一直都工作緊,而冇因為個人得閑就怠慢左落黎。咁當然,呢啲通常都無得吹水既,佢通常都好大機會問你學左既野,又或者有咩作品可以參考下,去証明你做過既野。所以見工前就麻煩你執靚翻自己個履歷表同 profolio 先好咁同人講呀。

 

 

最忌既回答:

 

1. 旅行

見工既時候,千其唔好同人講空白期係因為去左個旅行放鬆。就算事實係咁,都唔需要咁誠實既。事關你咁講,人地既第一印象就覺得你比較貪玩同無咩責任心既人,相對隔離個面試者話自己增值進修,你既理由就真係大為失色啦。就算你真係想如實話自己去左個短旅行,記住,一定要講你旅行所學到既野,同時連接翻落去點幫助到公司。咁樣既回答比起去玩就得體十倍有多啦。

 

2. 一直搵唔到工

我知有大部分人既空白期咁長,都係因為長期未搵到啱心水既工,所以個空白期先會越拖越長。但對 HR 黎講,佢地絕對唔會因為咁而同情你,最壞既情況係,佢地可能重會質疑你自身有問題先會導致冇公司肯請,從而淘汰你。要記住,你係 HR 面前係為自己講價,透過面試去增加自己既價值,而太誠實咁講出自己既弱點只會令自身貶值。所以,記得學識各種語言偽術,將自己好好包裝,自自然然就會勝人一籌。

 

結論

空白期既理由,相信大家睇完之後都有一定既領悟。但正處於空白期既你,想自己既理由變得有說服力,我在此勸喻,真係唔好浪費左你既空白期。其實空白期都係一段好好既時間比你整理下思緒,尋找自己真正想要既工作係咩,再朝住呢個方向增值自己,到最後你既努力一定會有人睇到。

各位打工仔,加油!

發表迴響